இதுவரை பேசப்படாத மன்னார் பேசாலையின் மறுபக்கம்-இடப்பெயர் ஆய்வு-ஊடகவியலாளர் ஜெகன்

இதுவரை பேசப்படாத மன்னார் பேசாலையின் மறுபக்கம்-இடப்பெயர் ஆய்வு-ஊடகவியலாளர் ஜெகன்

உலக படைப்பியக்கத்திலும், அதன் பின்னரான ஈழத் தமிழர்களின் வாழ்வியலிலும், அவர்கள் ஒரு தேசிய இனமாக கலை கலாச்சார பண்பாட்டு விழுமியங்களில் சிறந்து விளங்கியதைச் சங்க கால இலக்கியங்கள் பறைசாற்றுகின்றன. அந்த இலக்கியங்கள் கூறும் தமிழர்கள் சார்ந்த அனைத்து விடயங்களும் ஈழத் தமிழர்களையே குறிக்கிறது என்பதை ஆழமாக உணர முடிகிறது. அந்த வகையில், மன்னார் மாதோட்ட மண்ணின் இடப்பெயர்கள் மற்றும் மக்களின் வாழ்வியலை மையமாக வைத்து, பேசாலை கிராமத்தின் தொன்மங்களை அலசி ஆராய்கிறது இந்த ஆய்வுக் கட்டுரை.

தமிழ் வியூகம்  ஆசிரியர் பீடம்,

1. பழங்கால உலக வர்த்தகத்தின் மையப்புள்ளி

பேசாலை, பழங்கால உலக வர்த்தகத்தில் மிகவும் முக்கிய பங்கு வகித்த ஒரு சிறு நகரமாகும். இன்று அதன் சிறப்புகள் மறக்கடிக்கப்பட்டிருப்பது கவலைக்குரியது. மன்னார் மாவட்டத்தின் நகர பிரதேச செயலாளர் பிரிவில் அமைந்துள்ள இந்த நகரம், முன்னாளில் மாந்தை மற்றும் கட்டுக்கரை துறைமுகங்களுக்கு இணையான செல்வாக்குமிக்க துறைமுக நகரமாகத் திகழ்ந்தது.

மன்னார் எமில்நகர் விளையாட்டு மைதானத்தில் 4/12 கோடி மோசடி விளையாட்டுத்துறை அமைச்சரின் நடவடிக்கை தாமதம் ஏன்

இலங்கையின் வட கடலையும் தென்கடலையும் இணைக்கும் முக்கிய புள்ளியாக இந்தப் பேசாலை விளங்கியது. பவளப்பாறைகள், கடல் வாழ் உயிரினங்கள் மற்றும் செழிப்பான மீன்வளம் என இயற்கை வளங்கள் கொட்டிக்கிடக்கும் இந்தப் பூமி, வரலாற்றுக்கு முற்பட்ட காலம் முதலே பெரும் மதிப்பு வாய்ந்ததாக இருந்துள்ளது.

2. இடப்பெயர் ஆய்வு: 'பேசாலை' என்பதன் உட்பொருள்

"பேசாலை" என்னும் இடப்பெயருக்கான அர்த்தங்கள் பலவாறாகக் கூறப்படுகின்றன. 'பே' என்றால் அழகு, அச்சம், நுரை, மேகம் எனப் பல பொருள்கள் உண்டு.

• அழகும் மன்றமும்: 'பேயம்' என்றால் மன்றம் என்று பொருள். மக்கள் கூடும் அழகான மன்றமாக இது திகழ்ந்திருக்கிறது.

• அச்சம்: மாதோட்டம் முழுவதும் நாகர்களும் யட்சர்களும் வாழ்ந்ததால், அந்நியர்கள் உள்ளே நுழைய அச்சப்பட்டனர். கடற்கொள்ளையர்கள் கப்பல்களைக் கொள்ளையிட்டு மக்களுக்குப் பகிர்ந்தளித்த வரலாறும் உண்டு.

• பேய்த்தாழை: இப்பகுதியில் தாழை மரங்கள் (பேய்த்தாழை) அதிகமாக இருந்ததால், அது மருவிப் 'பேசாலை' ஆகியிருக்கலாம் என்பது ஒரு கருத்து.

சாலை என்பது பிரதான போக்குவரத்து வீதியைக் குறிக்கும். பனைமரங்கள் நேர்த்தியாக நின்றதால் 'பனைச்சாலை' என்றும், மீன் விற்கும் பெண்கள் (பேய்ச்சியர்) வீதிதோறும் அமர்ந்திருந்ததால் 'பேய்ச்சியர் சாலை' என்பது மருவிப் பேசாலையானது என்றும் ஆய்வாளர் கதிர் தணிகாசலம் குறிப்பிடுகிறார்.

3. கற்பக நாடு: பனை சார்ந்த சுய பொருளாதாரம்

கம்பராமாயணம் இந்த மன்னார் மாவட்டத்தை 'கற்பக நாடு' என்று போற்றுகிறது. இதற்குப் பேசாலையில் நிறைந்திருந்த கற்பகதருவான பனைமரங்களே காரணம்.

• கடல் உணவுப் பொருட்கள் (மீன், கருவாடு) மற்றும் பனை சார்ந்த பொருட்களை (பனங்கட்டி, பனை ஓலை பொருட்கள்) வெளிநாட்டு வியாபாரிகளுக்குக் கொடுத்துப் பண்டமாற்று முறையில் மக்கள் வணிகம் செய்தனர்.

• கால்நடைகள் மற்றும் கழுதைகள் மூலம் வன்னி, யாழ்ப்பாணம், மட்டக்களப்பு போன்ற பகுதிகளுக்குச் சென்று தங்களுக்குத் தேவையான அரிசி, தேன், நெல் போன்றவற்றை இவர்கள் பெற்று வந்தனர்.

4. சிறந்த கடலோடிகளும் உலகத் தொடர்பும்

பேசாலை மீனவர்கள் மிகச்சிறந்த கடலோடிகளாகத் திகழ்ந்தனர். நிலவின் சாயல் மற்றும் நட்சத்திரங்களின் இருப்பைக் கொண்டு கடற்பயணத்தை வெற்றிகரமாக முடிக்கும் ஆற்றல் கொண்டவர்கள். திசைமாறித் தத்தளித்த பல வெளிநாட்டு வணிகக் கப்பல்களை இவர்கள் மீட்டுள்ளனர். தமிழகத்தின் தென்மாவட்டங்களான தூத்துக்குடி, கன்னியாகுமரி போன்ற பகுதிகளுடன் இவர்களுக்கு இன்றும் இரத்த உறவுகள் நீடிக்கின்றன. இது குமரிக்கண்டத்தின் (லெமூரியா) எச்சமாக இப்பகுதி இருப்பதையே காட்டுகிறது.

5. பாதுகாப்பு அரணாகப் பேசாலை மண்

ஈழப் போராட்டம் தொடங்கிய பின்பு, பல ஆயிரக்கணக்கான உயிர்களைப் பாதுகாத்த புகலிடமாகப் பேசாலை மண் திகழ்கிறது.

• 1983 ஜூலை கலவரம்: தென்னிலங்கையில் இருந்து உயிரைக் காக்கப் புலம்பெயர்ந்த மக்கள் இப்பகுதிக்கு வந்து தங்கி, பின்னர் இந்தியா மற்றும் ஏனைய நாடுகளுக்குச் சென்றனர்.

• அகதிகளின் தஞ்சம்: 1990-களுக்குப் பின் ஏற்பட்ட யுத்த காலத்தில், மடு தேவாலயத்தைப் போலவே பேசாலை வெற்றி நாயகி ஆலயமும் பல்லாயிரக்கணக்கான மக்களுக்குப் பாதுகாப்பு அரணாக விளங்கியது.

கல்விச்சாலை, வைத்தியசாலை, நூதனசாலை என மானிட வாழ்வின் சகல தேவைகளுக்கும் 'சாலை' என்ற சொல் அவசியமாகிறது. அதேபோல், அறிவு, வீரம், கலை மற்றும் வணிகம் என அனைத்தும் ஒன்றுகூடிய பெரிய 'சாலையாக' இந்தப் பேசாலை திகழ்ந்திருக்கிறது. தூங்கா நகரமாக விளங்கிய பழைய மதுரை - மாதோட்டத்தின் எச்சமான பேசாலையின் வரலாறு ஆவணப்படுத்தப்பட வேண்டியது காலத்தின் கட்டாயம்.

நன்றி:-தொகுப்பு:-ஜெகன், ஊடகவியலாளர்

@tamilviyugam